Қазақстанда тұрғын үйлерде орналасқан қоғамдық тамақтану нысандарына қойылған жаңа санитарлық талаптар мейрамханалар мен кафелердің жаппай жабылуына әкелуі мүмкін, деп хабарлайды Inbusiness.kz.

Жаңартылған санитарлық нормаларға сәйкес, қоғамдық тамақтану орындары инженерлік желілерді қайта жаңғыртуға, оның ішінде желдету жүйелерін ғимарат шатыры деңгейінен жоғары шығаруға және май ұстағыш құрылғылар орнатуға міндетті. Алайда бұл талаптарды орындау көпқабатты тұрғын үй тұрғындарының келісімін алу және көптеген рұқсат рәсімдерінен өту қажеттілігіне байланысты күрделене түсуде.

Нарық өкілдерінің айтуынша, қажетті келісімдерге қол жеткізу үшін кәсіпкерлер көбіне аулаларды абаттандыру, шлагбаум орнату секілді қосымша шығындарды өз мойнына алуға мәжбүр.

Жаңа талаптарға қатысты алаңдаушылықты ҚР Парламентінде де білдірді. Мәжіліс депутаты Олжас Нуралдинов жаңартылған санитарлық нормаларды қайта қарауды және оларды инженерлік шешімдерді жобалау кезеңінде қарастыруға болатын жаңа қоғамдық тамақтану нысандарына ғана қолдануды ұсынды.

Салаға азық-түлік бағасының өсуі, кадр тапшылығы, инфляция және салықтық реттеудегі өзгерістер де қосымша қысым көрсетуде. Салалық қауымдастық деректеріне сәйкес, 2025 жылдың 10 айында Қазақстанда 13 мыңнан астам мейрамхана, кафе және асхана жабылған.