Қазақстандағы мейрамханалар экономикалық қысым аясында тұтынушылық мінез-құлықтың өзгергенін байқап отыр. Келушілер кафе мен мейрамханаларға баруын жалғастырғанымен, орташа тапсырыс көлемі айтарлықтай қысқарған. Бұл туралы ресторатор Юрий Негодюк Forbes Kazakhstan YouTube-арнасына берген сұхбатында айтты.

Кәсіпкердің сөзінше, бұрын қонақтар мол тапсырыс берсе, қазір көбіне сусын мен жеңіл тіскебасармен шектеледі. Сонымен қатар келушілер бір шыныаяқ кофемен бірнеше сағат бойы отыра алады.

Негодюк қазіргі таңда мейрамхана бизнесі тек өзара ғана емес, стримингтік сервистер, серуендеу және үйдегі демалыс секілді балама бос уақыт өткізу форматтарымен де бәсекелесіп жатқанын атап өтті. Сондықтан мекемелер аз көлемде тапсырыс беретін қонақтарға да барынша ашық бола түскен.

Шығындардың өсуі аясында ресторатордың мекемелеріндегі орташа чек соңғы екі жылда жыл сайын шамамен 30%-ға өсіп келеді. Бағаның қымбаттауына азық-түлік, жалдау ақысы, коммуналдық қызметтер мен жалақы шығындарының артуы себеп болған.

Сондай-ақ Негодюк соңғы уақытта шығындардың көбеюі, локациялардың өзгеруі және кейбір форматтардың ескіруі салдарынан алты мейрамхананы жапқанын айтты. Сонымен қатар кәсіпкер сегіз жаңа мекеме ашқан.