Қазақстанда берілген кассалық чектер саны мен ақша айналымының өсуі тіркелді, бұл бизнестің табыстарын кезең-кезеңімен заңдастыру үдерісін көрсетуі мүмкін, деп хабарлайды «Учет.kz» басылымы Мемлекеттік кірістер комитеті төрағасының орынбасары Жаныбек Нұржановтың сұхбатына сілтеме жасап.

МКК деректеріне сәйкес, 2026 жылдың қаңтар–ақпан айларында кәсіпкерлер 657 млн чек берген. Бұл өткен жылдың осы кезеңіндегі 555 млн чекпен салыстырғанда 18% өсімді көрсетеді. Ақшалай мәнде айналым көлемі 4,2 трлн теңгеден 5,1 трлн теңгеге дейін өсіп, шамамен 20% өсім тіркелді.

Ведомствоның мәліметінше, бұл динамика тауар айналымының ұлғаюымен ғана емес, бизнестің бір бөлігінің «көлеңкеден шығуымен» және салық тәртібінің күшеюімен байланысты болуы мүмкін. Нұржановтың айтуынша, арнайы салық режимдеріндегі өзгерістер аясында кәсіпкерлер сатылымдарды жиі тіркей бастаған.

2026 жылдың басынан бастап Қазақстанда салықтық әкімшілендіру саласында бірқатар өзгерістер күшіне енді, соның ішінде шағын бизнес арасында кең таралған бөлшек сауда салығы жойылды. Сонымен қатар патент және тіркелген шегерім негізіндегі режимдер қысқартылып, ірілендірілген жаңа санаттарға біріктірілді.

Атап айтқанда, өзін-өзі жұмыспен қамтығандар үшін жаңа арнайы салық режимі бұрынғы патент төлеушілер мен E-Salyq мобильді қосымшасын пайдаланушыларды біріктірді. Жаңартылған оңайлатылған декларация бұрынғы режимдердің кейбір элементтерін қамтып, шекті табыс деңгейін ұлғайтты және контрагенттер бойынша шегерім талаптарын күшейтті.

Салық жүйесіндегі реформа әкімшілендіруді жеңілдетуге және кәсіпкерлік қызметтің ашықтығын арттыруға бағытталған.