2025 жылдың төртінші тоқсанында Қазақстандағы жұмыспен қамтылған халық саны 9,3 млн адамға жетіп, өткен жылдың сәйкес кезеңімен салыстырғанда 110 мың адамға артты. Өсім негізінен жалдамалы қызметкерлер есебінен қамтамасыз етілді: олардың үлесі 77%-ды (7,2 млн адам) құрады, ал өзін-өзі жұмыспен қамтығандар – 23% (2,1 млн адам).

Ұлттық статистика бюросының деректеріне сәйкес, елдегі ең ірі жұмыс беруші – сауда секторы. Бұл салада барлық жұмыспен қамтылғандардың 17%-ы немесе 1,57 млн-нан астам адам еңбек етеді. Осылайша, сауда еңбек нарығының негізгі сегменті және экономикадағы ең ірі жұмыспен қамту саласы мәртебесін сақтап отыр.

Жұмыспен қамтылғандар саны бойынша екінші орында білім беру саласы – 13,2% (шамамен 1,22 млн адам). Өнеркәсіпте экономикалық белсенді халықтың 12,5%-ы, ауыл шаруашылығында – 10,3%-ы жұмыс істейді.

Көлік-логистика және қоймалау секторында жұмыспен қамтылғандардың 7,2%-ы, құрылыс саласында – 6,8%, денсаулық сақтау саласында – 6,6% еңбек етеді.

Жұмыспен қамту құрылымы тұтынушылық және әлеуметтік салаларда еңбек ресурстарының тұрақты шоғырлануын көрсетеді. Нарық үшін бұл сауданың іскерлік белсенділік пен ішкі сұраныстың негізгі драйвері ретіндегі жоғары рөлін, сондай-ақ әлеуметтік секторға түсетін жүктеменің сақталып отырғанын білдіреді.