IBC Global деректеріне сәйкес, елордадағы сапалы қойма алаңдарының 90%-дан астамы Байқоңыр, Сарайшық және Алматы аудандарында орналасқан.

Бүгінде Астана Қазақстандағы көлемі бойынша екінші қойма нарығы болып саналады. Қалада жалпы ауданы 400 мың шаршы метрден асатын 26 сапалы қойма кешені жұмыс істейді.

Нарықтың 51,5%-ын А класты қоймалар құрайды. Қалада осындай 11 нысан бар. Тағы 15 нысан В класына жатады және ұсыныстың 48,5%-ын қамтамасыз етеді. Сонымен қатар, А класты қоймалар көлемі жағынан ірі келеді: олардың орташа ауданы шамамен 18,9 мың шаршы метр болса, В класты қоймаларда бұл көрсеткіш 14 мың шаршы метрді құрайды.

IBC Global мәліметінше, қазіргі уақытта елордада алыпсатарлық құрылыс және build-to-suit (BTS) форматындағы 12 жоба іске асырылып жатыр. 2027 жылға дейін нарық шамамен тағы 40 мың шаршы метр жаңа қойма алаңымен толығуы мүмкін.

Нарық құрылымын айтарлықтай өзгертуі ықтимал екі ірі жоба да назар аудартады. Олар — ауданы 166 мың шаршы метр болатын Wildberries қоймасы және 80 мың шаршы метрлік Mercury Properties Solutions жобасы. Бұл нысандардың пайдалануға берілу мерзімдері әзірге жарияланған жоқ.

Қойма нарығының белсенді дамуына қарамастан, Астанада мамандандырылған инфрақұрылым тапшылығы сақталып отыр. Қолданыстағы сапалы қоймалардың небәрі 8%-ы ғана тоңазытқыш немесе мұздатқыш аймақтармен жабдықталған. Ал бөлшек сауда желілері мен өндірушілер тарапынан көптемпературалы сақтау жүйелеріне сұраныс артып келеді. Сонымен қатар, елордада light industrial форматындағы нысандар әзірге мүлдем жоқ.

Сапалы қойма жылжымайтын мүлкінің ең үлкен шоғырлануы Байқоңыр ауданында орналасқан. Мұнда қаладағы барлық ұсыныстың 43,9%-ы немесе шамамен 177 мың шаршы метр қойма алаңы орналасқан.

Негізгі нысандар Алаш тасжолы мен Астана – Алматы автожолы бойында шоғырланған. Ірі объектілер қатарында OZON компаниясының Rainbow Logistic 2 фулфилмент-орталығы, Astyk Logistic және Sapa Logistics бар. Ауданның тағы бір маңызды артықшылығы – «Астана – жаңа қала» арнайы экономикалық аймағына жақын орналасуы. Оның резиденттері бірқатар салықтық жеңілдіктерді пайдалана алады.

Сарапшылар сондай-ақ Алаш тасжолында орналасқан «А-Сталь Азия» кластерін перспективалы жобалардың бірі ретінде атап өтеді. Мұнда жалпы ауданы 27 мың шаршы метр болатын екі жұмыс істеп тұрған қойма блогынан бөлек, температуралық режимі -24°C-тан +8°C-қа дейінгі көптемпературалы қойма жобалануда. Оның ауданы шамамен 11 мың шаршы метрді құрайды.

Сапалы қойма инфрақұрылымының көлемі бойынша екінші орында Сарайшық ауданы тұр. Мұнда қалалық ұсыныстың 30,2%-ы немесе шамамен 122 мың шаршы метр қойма алаңы шоғырланған.

Аудан Астана – Қарағанды автожолы бойында қалыптасқан логистикалық кластер ретінде дамып келеді.

Мұндағы негізгі нысан – ауданы 40 мың шаршы метрден асатын Continental Logistics көлік-логистикалық орталығы. Оның құрамына тоңазытқыш және мұздатқыш қоймалар кіреді. Бүгінде бұл Астанада толыққанды көптемпературалы сақтау инфрақұрылымымен жабдықталған жалғыз жұмыс істеп тұрған қойма кешені саналады. Сонымен қатар ауданда «Фаэтон-Технодом» компаниясының «Астана» логистикалық орталығы және Eurotransit компаниясының «Нұр Жолы» қойма кешені орналасқан.

Үшінші орында Алматы ауданы орналасқан. Оның үлесіне сапалы қойма ұсынысының 17,3%-ы немесе шамамен 70 мың шаршы метр келеді. Мұндағы қойма қоры салыстырмалы түрде жаңа: нысандардың басым бөлігі соңғы үш жылда пайдалануға берілген.

Жұмыс істеп тұрған кешендер қатарында AIE Logistics компаниясының «Ишим» терминалы, Alliance Company қойма кешені және Rainbow Logistic логистикалық орталығы бар.

Сарапшылар қазіргі уақытта инвесторларға ұсынылып отырған екі жобаны ерекше атап өтеді.

Біріншісі – «Бәйтерек» монументінен тоғыз шақырым жерде орналасқан «Альянс» логистикалық кешені. Аумағы 4,18 гектар болатын учаскеде ауданы шамамен 2,8 мың шаршы метр қойма кешені жұмыс істеп тұр. Оның якорлық жалға алушысы – халықаралық DPD логистикалық компаниясы. Жобаның даму әлеуеті қосымша 14 мың шаршы метрге дейін қойма алаңын салуға мүмкіндік береді.

Екіншісі – Ақжол даңғылында орналасқан Qurmet Logistics жобасы. Ауданы 6,4 мың шаршы метр қойма 7 мың паллет орынға есептелген және 2026 жылдың тамыз айында пайдалануға беріледі. Құрылыс аяқталғанға дейін нысанды нақты клиенттің қажеттіліктеріне сәйкес BTS форматында бейімдеуге болады.

Сонымен қатар Есіл, Нұра және Сарыарқа аудандарында сапалы қойма инфрақұрылымы іс жүзінде жоқ. IBC Global бағалауынша, дәл осы бағыттар орта мерзімді перспективада жаңа логистикалық жобаларды дамыту үшін ең жоғары әлеуетке ие.