Француздық халықаралық Danone корпорациясы Алматы облысының Іле ауданында (Байсерке) 2 500 шаршы метр өндірістік-қойма алаңын жалға алды. Компания сүт өнімдері, бөтелкедегі су, балалар және емдік тағам өндіру бойынша әлемдік көшбасшылардың бірі болып табылады.

Мәмілеге халықаралық консалтингтік IBC Global компаниясы кеңесші болды. Нысан бір апта ішінде таңдалып, жалға алушыға барлық талаптарға сай келетін А класындағы жаңа қойма ұсынылды. Қойма заманауи инженерлік инфрақұрылыммен және техникалық жүйелермен жабдықталған.

Қойма орналасқан өнеркәсіптік аймақта жүк көліктерінің маневр жасауына арналған алаңдар мен автотұрақ қарастырылған. Нысан өңірлік логистика үшін стратегиялық маңызы бар жерде орналасқан: ол БАКАД-тан бірнеше шақырым жерде, Құлжа тас жолының бірінші желісінде тұр. Сондай-ақ жақын маңда «Батыс Еуропа — Батыс Қытай» автомагистралі белсенді түрде дамып келеді.

Жаңа қойма Danone зауытына жақын орналасқан. Қазіргі таңда мұнда жыл сайын 18 000 тоннадан астам сүт өнімдері өндіріледі. 2025 жылы компания өндіріс көлемін жылына 40 000 тоннаға дейін арттыру жоспарын жариялаған болатын. Қуаттылықты ұлғайту қосымша сақтау алаңдарын қажет етті.

«Ұзақ мерзімді келісімшартқа қол қойылды, жаңа қойма қосымша хаб ретінде көмекші материалдарды сақтау үшін пайдаланылатын болады. Бұл ритейлерге үзіліссіз жұмыс істеуге мүмкіндік беріп, компанияның одан әрі өсуіне ықпал етеді.Бұл мәміле нарық үшін тән құбылыс, ол Алматының негізгі логистикалық тораптарында А класындағы сапалы қойма алаңдарына сұраныстың жоғары екенін көрсетеді. Сондай-ақ кәсіби сүйемелдеу іздеу мерзімін едәуір қысқартып, жалға алушының ерекшеліктерін және қажетті параметрлерді нақты ескеруге, сондай-ақ клиенттің мүддесін мәміленің барлық кезеңінде қорғауға мүмкіндік бергенін атап өткен жөн», — деді IBC Global басқарушы серіктесі Станислав Ахмедзянов.